Գեղեցիկ կազմվածքի մասին պետք է հոգ տանել, եթե անգամ այն Դուք ունեք: Ավելի հեշտ է պահպանել ունեցածը, քան հետո դիետաների ցանկ կազմել: Եվ այսպես, LN-ը Ձեզ է ներկայացնում այն մի քանի քայլերը, որոնք Ձեզ երբեք չեն մոլորեցնի գեղեցիկ լինելու ճանապարհին:
Օգտագործեք կապույտ եւ կարմիր սպասք
Փորձեք, թե որ գույնն է ավելի վատ անդրադառնում Ձեր ախորժակի վրա :) Որոշ մարդկանց դեպքում կապույտն է զսպում ուտելու ցանկությունը, իսկ կարմիրը՝ գրգռում ախորժակը, մյուսների դեպքում՝ հակառակը. կապույտը խաղաղորեն տրամադրում է ուտելու, իսկ կարմիրը ազդանշանի նման հիշեցնում է չափի զգացման մասին: Մի խոսքով՝ սպասքի գույնը կարող է օգնել ախորժակը զսպելու գործում:
Նախաճաշին ձու կերեք
Ամերիկացի դիետոլոգները վերջերս ուսումնասիրություն հրապարակեցին, համաձայն որի՝ լավ կազմվածք պահպանելու համար լավագույն նախաճաշը մեկ ձուն է հնարավորինս քիչ հացով: Այն ապահովում է օրգանիզմի կենսունակության համար անհրաժեշտ կալորիաները՝ միաժամանակ չգիրացնելով:
Մեծ պատառաքաղներ ու գդալներ օգտագործեք
Սա եւս քիչ ուտելուն նպաստող խորամանկությունների շարքից է: Իտալական ռեստորաններից մեկում դիետոլոգները ամիսներ շարունակ հետեւել են հաճախորդներին, որոնց առաջարկվել են մեծ ու փոքր չափսի պատառաքաղներ եւ դանակներ: Արդյունքները ցույց են տվել, որ մեծ պատառաքաղով, որքան էլ զարմանալի է, ուտում են ավելի փոքր պատառներով:
10 րոպեանոց դադար
Շատ կարեւոր է աշխատանքային լարված օրվա ընթացքում տասը րոպեով կարողանալ կտրվել ամեն ինչից, փակել աչքերը եւ մոռանալ հոգսերի մասին: Դիետոլոգները նշում են, որ աշխատանքային սթրեսը կարող է ի դերեւ հանել Ձեր բոլոր դիետաները եւ նիհարելու ջանքերը, եթե ժամանակին կանգ չառնեք:
Կես ժամանոց զբոսանք
Լավագույն տարբերակը ուտելուց հետո երեկոյան կես ժամ մաքուր օդում քայլելն է: Ճապոնացի հետազոտողների վերջին ուսումնասիրությունները ցույց են տվել, որ իսկապես ամենաինտենսիվ ժամանակահատվածը ուտելուն հաջորդող կես ժամն է: Անգամ երբ հետաձգում եք ընդամենը մեկ ժամով, արդյունավետությունը կորչում է:
80 տոկոսի սկզբունք
Միշտ բավարերեք Ձեր ուտելու ցանկության առավելագույնը 80 տոկոսը: Սեղանի մոտից կուշտ հեռանալու դեպքում կարող եք հույս չունենալ, թե հասնելու եք արդյունքի: Սկզբում դժվար կլինի, բայց ժամանակի հարց է. շուտով կզգաք 80 տոկոսի հաճույքը :):
Сообщения
0 коммент.